Language
  • Deutsch
  • English
  • Español
  • Français
  • Italiano
  • Português
  • Moleiro na Casa Simeón

    Moleiro na Casa Simeón
    Download PDF

    ARTE MEDIEVAL / O editor ourensán residente en Barcelona abre o 4 de maio en Santiago unha exposición coas súas reproducións clónicas de fermosos códices e mapas medievais

    Rescata para os ollos contemporáneos obras secuestradas durante séculos en bibliotecas e museos

    Manuel Moleiro é coñecido en todo o mundo polas súas reproducións clónicas dos códices máis fermosos realizados na época medieval e no Renacemento.

    Polas súas mans pasaron algúns dos libros mellor gardados a través dos séculos, nalgúns casos ''tocados unicamente por catro ou cinco persoas en 500 anos'', asegura.


    A súa editorial, localizada en Barcelona e considerada a mellor do mundo nesta tarefa, rescata para os ollos do home contemporáneo obras secuestradas en vitrinas de bibliotecas ou nas caixas fortes dos museos, dando así a oportunidade a estudiosos e bibliófilos de desfrutar delas de principio a fin.

    Os códices de Moleiro poden atoparse nestes momentos en máis de oitenta países. Ademais de facelos renacer, encárgalles ós mellores medievalistas o seu estudo. É a súa contribución á cultura e o mantemento dun legado que, de non ser polo seu traballo, o tempo e as súas feridas encargaríanse de borrar.

    O vindeiro 4 de maio, a Casa Simeón de Santiago acollerá a inauguración da exposición Tesouros bibliográficos e mapas medievais, unha mostra do seu traballo ó longo de doce anos que se poderá desfrutar ata o día 28.

    Este galego universal de San Facundo de Cea traerá á cidade do Apóstolo por primeira vez, entre outros, a fastuosidade das imaxes de varios códices do Beato de Liébana, cualificados por Umberto Eco como ''o maior acontecemento iconográfico da historia da humanidade'', a Biblia de San Luis, unha magna obra en tres tomos do século XIII encargada para a educación do rei de Francia, El Caballero Zifar, a primeira novela escrita en castelán e o libro polo que o editor sente predilección e El libro de los medicamentos simples, un volume excepcional non só pola beleza das súas ilustracións senón porque corresponde á culminación dos saberes curativos dos medievais europeos.
    Os que acudan a esta marabillosa exposición tamén poderán contemplar a reprodución do Atlas Universal de Diego Homem, un códice pertencente á Biblioteca de San Petersburgo, obra dun cartógrafo portugués do século XVI.

    Edicións como obras pintadas
    A Editorial Moleiro realiza unha tirada única de 987 exemplares numerados e autentificados notarialmente de cada códice. As bibliotecas que custodian os orixinais, unha vez que deixan as súas xoias para seren reproducidas, non o volven permitir. Os clónicos reproducen todos os detalles do códice, empezando polo soporte cun papel especial de espesor variable, ata a impresión, con ouro, prata e tinguiduras case idénticas. Máis que unha obra impresa é unha obra pintada.

    EN, UN NOME DE MULLER DO SÉCULO X QUE REVOLUCIONOU OS 'SCRIPTORIA'
    A mostra da editorial de Manuel Moleiro na Casa Simeón contará co seu último traballo. Presentado a semana pasada no Museu Nacional d'Art de Cataluña, o 'Beato de Liébana, códice de Girona' é o máis iluminado de todos os Beatos e o único que se sabe que foi pintado por unha muller chamada En (End depintrix), que contou, como axudante, co presbítero Emeterio. Durante moito tempo esta artista do século X foi menosprezada polo simple feito de ser muller. No estudo que acompaña este case-orixinal, como lles gusta chamar a Moleiro ás súas edicións, corríxese esta afronta por Carlos Miranda, autor do estudo das miniaturas. Moleiro ten compradores e admiradores en todo o mundo. Son bibliotecas, universidades, institucións culturais e particulares que esperan con ansiedade o nacemento dun novo case-orixinal. No seu obradoiro, un equipo de sesenta persoas logran o milagre mesturando as técnicas artesanais máis antigas coa última tecnoloxía. É un labor longo e laborioso que implica polo menos 18 meses de traballo para culminar a edición dun códice. O resultado deste fascinante labor editorial poderá contemplarse en Santiago de Compostela a partir da vindeira semana.

    Carina Regueiro. Santiago